Siân Gwenllian AS Gweitho dros bobol Arfon

Mae Siân Gwenllian AS wedi croesawu’r cyhoeddiad y bydd canolfan hyfforddi ddeintyddol yn cael ei hagor yng ngogledd Cymru, ond mae’n gofyn beth fydd Llywodraeth Cymru yn ei wneud yn y cyfamser i fynd i’r afael ag ‘argyfwng go iawn.’ 

Mae Siân Gwenllian, Aelod o’r Senedd dros etholaeth Arfon wedi croesawu’r cyhoeddiad y bydd canolfan hyfforddi ar gyfer deintyddiaeth yn agor yng ngogledd Cymru. Fodd bynnag, mae'r AS wedi mynegi pryderon, gan ddweud; 

“fod canolfan o’r fath ddwy neu dair blynedd i ffwrdd, ac yn y cyfamser, mae yna argyfwng gwirioneddol yn digwydd yn fy etholaeth i. 

Yn ei hanerchiad i Mark Drakeford, Prif Weinidog Cymru, honnodd yr AS fod; 

“rhan o'r broblem yn codi o'r ffordd mae'r cytundebau yn gweithio rhwng deintyddion a'r byrddau iechyd, ac mae yna addewid wedi bod ers tro y byddai'r Llywodraeth yma yn edrych yn fanwl ar beth sydd angen ei wneud er mwyn gwella'r sefyllfa yna. 

Fedrwch chi symud ymlaen efo'r gwaith yna rŵan os gwelwch yn dda?  

Ar y funud, mae pobl yn fy etholaeth i yn cael eu gadael i lawr.  

Mae yna ddeintyddfa arall yn cau y flwyddyn nesaf, ac mae yna wirioneddol angen gweithredu buan yn y maes yma. 

Yn ei ateb rhoddodd y Prif Weinidog fai ar Brexit, gan ddweud 

“Mae Brexit wedi cael effaith negyddol ar wasanaethau deintyddol.  

Mae 17 y cant o'r deintyddion sy'n cael eu cyflogi gan y cwmnïau mawr—a'r cwmnïau mawr sy'n cwympo mas o ardaloedd fel y gogledd-orllewin—yn cael eu recriwtio o'r Undeb Ewropeaidd, ac mae Brexit yn tanseilio hynny.” 

Serch hynny, nododd yr FM y byddai uned ddeintyddiaeth newydd yng ngogledd Cymru yn gwella’r sefyllfa. 

Ychwanegodd Siân Gwenllian AS; 

“Mae angen cynllun tymor hir ar Lywodraeth Cymru i fynd i’r afael â’r heriau hyn.”