Siân Gwenllian AS Gweitho dros bobol Arfon

Mae’r Aelod o’r Senedd dros Arfon wedi beirniadu oedi Llywodraeth Cymru gyda system brofi Covid-19 yng ngogledd Cymru.

Daw’r feirniadaeth ar ôl datganiad gan Lywodraeth Cymru y bydd canolfan brofi newydd yn cael ei hagor ym Mangor ‘o fewn pythefnos.’

Mae Siân Gwenllian AS wedi datgan ei hanghrediniaeth y bydd pythefnos arall hyd nes y bydd canolfan brofi newydd yn cael ei hagor ym Mangor.

Dywedodd yr Aelod o’r Senedd dros Arfon, etholaeth sy'n cynnwys dinas Bangor;

“Ymddengys nad yw Llywodraeth Cymru wedi clywed am flaengynllunio, hyd yn oed wedi misoedd o’r pandemig.

Alla i ddim credu y bydd yn bythefnos arall cyn i ni gael canolfan brofi newydd ym Mangor. ”

Daw rhwystredigaeth Siân Gwenllian yng ngoleuni cynnydd mewn achosion yng Ngwynedd, a phryder y gallai'r sir wynebu cyfnod clo lleol.

“Roedd yn hollol amlwg y byddai angen mwy o brofi pan fyddai myfyrwyr yn dychwelyd i'r ysgolion, y colegau lleol, a Phrifysgol Bangor.

Nid yw'r sefyllfa hon yn ddigon da. Mae system brofi ac olrhain effeithlon yn hanfodol i atal lledaeniad y feirws.”

Yr wythnos hon mae'r AS wedi cyflwyno cwestiynau i Vaughan Gething, y Gweinidog Iechyd.

“Rwyf wedi gofyn i’r Gweinidog Iechyd, Vaughan Gething, pryd y bydd canolfannau profi cymunedol Ysbyty Alltwen a Pharc Menai yn ailddechrau profi. Rwyf hefyd wedi gofyn pa gyfleusterau profi cymunedol sydd ar gael yng Ngwynedd, a pha gyfleusterau sydd ar gael i brofi gweithwyr allweddol yng Ngwynedd. ”