Gwynedd yn cymryd cam yn nes at ofal plant i bawb wrth i ddarpariaeth am ddim ar gyfer plant dwy oed

Mae Siân Gwenllian AS wedi croesawu ehangu darpariaeth gofal plant wedi’i ariannu gan Lywodraeth Cymru, wrth i Wynedd gyflwyno 12.5 awr o ofal plant am ddim yr wythnos i blant dwy oed o fis Tachwedd ymlaen.

Mae Gwynedd yn cymryd cam pwysig tuag at system gofal plant am ddim i bawb, drwy gyflwyno 12.5 awr o ofal plant wedi’i ariannu gan Lywodraeth Cymru yr wythnos i blant dwy oed, gan ddechrau ar 2 Tachwedd 2026.

Mae Siân Gwenllian, Aelod o’r Senedd dros Wynedd Maldwyn, wedi croesawu’r cyhoeddiad am yr ehangu, gan dynnu sylw at bwysigrwydd gofal plant fforddiadwy er mwyn cefnogi teuluoedd, mynd i’r afael â thlodi, a rhoi’r dechrau gorau mewn bywyd i blant.

“Mae cefnogaeth gofal plant i deuluoedd yn un o’r prif arfau o ran mynd i’r afael â thlodi ac anghydraddoldeb rhwng rhyweddau, cefnogi ein heconomi a gwella canlyniadau addysgol,” meddai Siân Gwenllian.

“Rai misoedd yn unig yn ôl, dim ond tri awdurdod lleol oedd yn cynnig gofal plant wedi’i ariannu gan Lywodraeth Cymru i blant dwy oed. Mae’r ffaith bod pob un o’r 22 awdurdod bellach ar y trywydd iawn i wneud hynny cyn mis Ebrill yn dangos y cynnydd rhyfeddol sy’n cael ei wneud o ganlyniad i weledigaeth benderfynnol Plaid Cymru i wneud gofal plant yn fwy fforddiadwy i deuluoedd ledled Gwynedd a Chymru.”

Mae’r ehangu yn rhan o uchelgais Llywodraeth Cymru i ddarparu’r cynnig gofal plant mwyaf hael yn y DU, gan helpu rhieni i ddychwelyd i’r gwaith, cefnogi teuluoedd gyda chostau byw, a gwella cyfleoedd i blant.

“Mae’r llywodraeth hon, dan arweiniad Plaid Cymru, eisoes wedi cyflawni mewn ychydig fisoedd yr hyn na lwyddodd Llafur i’w wneud mewn pum mlynedd,” ychwanegodd Siân Gwenllian.

“Drwy weithio mewn partneriaeth â Chyngor Gwynedd, sy’n cael ei arwain gan Blaid Cymru, rydan ni’n cymryd camau pellach i gefnogi teuluoedd yn well o fis Tachwedd ymlaen. Mae hwn yn gam enfawr ymlaen, sy’n helpu rhieni i ddychwelyd i’r gwaith, yn cefnogi teuluoedd gyda chostau byw, ac yn rhoi’r dechrau gorau mewn bywyd i bob plentyn.”

Ehangu pellach wedi’i gynllunio

Mae cam presennol Llywodraeth Cymru o ehangu gofal plant yn canolbwyntio ar gwblhau’r gwaith o gyflwyno 12.5 awr wedi’i ariannu yr wythnos i bob plentyn dwy oed ledled Cymru. Bydd camau dilynol yn anelu at gynyddu cymorth i blant dwy oed i 20 awr yr wythnos am 48 wythnos, tra'n gweithio gyda darparwyr gofal plant i ymestyn y cynnig ehangach i bob plentyn tair a phedair oed.

Y nod yw adeiladu ar y cynigion hyn cyn ymestyn y cymorth i blant rhwng naw mis a dwy oed.